Azərbaycanda yeni ov mövsümünün başlanması ilə əlaqədar ovçular üçün qaydalar və müəyyən edilmiş normalara əməl olunması ilə bağlı xəbərdarlıq edilib.
Cənub Media xəbər verir ki, Ov Məsələləri üzrə Koordinasiya Şurasının növbəti iclasında oktyabrın 10-dan etibarən ölkə üzrə ov mövsümünün açıq elan edilməsi barədə qərar qəbul olunub.
Bioloji Müxtəlifliyin Qorunması Xidmətinin rəsmisi Rəşad Allahverdiyevin bildirdiyinə görə, ov etmək istəyən vətəndaşlar ovlanmasına icazə verilən vəhşi heyvan və quşların növləri, ovlanma müddətləri və müəyyən edilmiş normalar barədə məlumatları Ekologiya və Təbii Sərvətlər Nazirliyinin rəsmi internet səhifəsinin “Elanlar” bölməsindən əldə edə bilərlər.
Ov mövsümünün açılması Azərbaycanın cənub bölgəsində də ovçuluq təsərrüfatlarına və müəyyən edilmiş ov ərazilərinə marağın artmasına səbəb ola bilər. Cənub rayonlarında müxtəlif təbii ərazilərin və ovçuluq təsərrüfatlarının mövcudluğu nəzərə alınaraq, ov həvəskarlarının müəyyən edilmiş qaydalara ciddi əməl etməsi xüsusi əhəmiyyət daşıyır.
Mütəxəssislər ovçulara yalnız ov üçün müəyyən edilmiş ərazilərdən və qanunla fəaliyyət göstərən ovçuluq təsərrüfatlarından istifadə etməyi, icazə verilən növ və say həddini aşmamağı tövsiyə edirlər.
Eyni zamanda, təbiətin qorunması və bioloji müxtəlifliyin mühafizəsi məqsədilə qanunsuz ov hallarına yol verilməməsinin vacibliyi diqqətə çatdırılır.
Ov həvəskarlarına mövsüm başlamazdan əvvəl qüvvədə olan qaydalar, ov müddətləri və normalarla tanış olmaları tövsiyə olunur.
Cənub Media, Lənkəran
